**** ألم وحنين ****

ماسك حبال الصبر
متشعلق بقالي سنين
بتغيب شمس أيامي
بضحك وقلبي حزين
وأصبر نفسي ع الايام
واقول عشان نن العين
هم فرحتي في الدنيا
وزرع رويته بالأنين
كنت بفرح لما أشوفها
تخطى خطوة والا اتنين
عيوني ديما محاوطاها
ادعي يارب احفظها
يرد قلبي يقول امين
ضحيت بعمري لاجل الورد
يفتح ويزين البساتين
يوم ورا يوم الوانها ب تنور
واقول ربنا عوض الصابرين
مكنتش اعرف ان الورد
ممكن يجرح قلب فاض بالحنين
وف لحظة ينسي شقي البستاني
وبكل قسوته يساله انت مين
وازاي تعشم بمحبتي
وطول عمرنا منك محرومين
احنا ملناش غير ارضنا
شجرة طارحة ب تظلنا
هى الامل وهى اجمل حلمنا
هي الحضن اللي به مطمئنين
الدمعة سالت من عيوني
والقلب يصرخ ارحموني
والروح بتخرج من الجسد
تقول ورودك ب يظلموني
ولوجودك مش محتاجين
آه يا الف صرخة بين الضلوع
تاه الطريق مني ومفيش رجوع
غريب النفس بين اعز الناس
وبايدهم قلبي يبكي بالدموع

بقلم الشاعر / مصطفي كرم
#Mostafaa-Karm

 بواسطة ‏‎Mostafaa Karm‎‏