**** ضحكة خوف ****

مش كل ضحكة
معناها سعادة
يمكن عشان 
المر بزيادة
وعشقنا ديما نشرب
القهوة سادة
حتي في الفرح
نخاف و بقت عادة
لو مرة ضحكنا بصوت عالي
يقولي عقلي ياعم افرح
بس بهوادة
وعيني ترف وكأن الحزن
من بختي بقي عبادة
**********************
سيبك بقي يا عم
دا الهم ما يتلم
نضحك بصوت مبحوح
وهي حلاوة روح
قسمة ومكتوبه
منين ما نروح
خلي الفرحة مكتومة
وبلاش بالضحكة تبوح
وإن مرت عليك الدمعة
ابني بينك وبينها صروح
لحد امتي نخاف الفرح
ونقول دا بداية الجروح
ارمي تكالك ع الله
نصيبك يجيلك
منين م تروح
************************
خلاص يا دنيا
مفيش منك خوف
هعيش بقي دنيتي
ومعرفش فيها كسوف
ومهما الحظ عاندني
هضحك بقلب عطوف
افتح دراعي للامل
واقابله بشوق ملهوف
لدنيا ترسم فرحتي
لحن وغني وحروف
والحب يعرف سكتي
ويعلي صوت الدفوف
واخلي الضحكة عنواني
وادوس علي الظروف
دا العمر ايامه معدوده
ليه نعيشه بألم وخوف
**************************
**** Mostafaa Karm ****

 بواسطة ‏‎Mostafaa Karm‎‏
 https://www.facebook.com/nabdat.2017/videos/2063936043878681/