….. ولد هنية …..
***
دخل في يوم عليا
في ساعة مغربية
وطي يبوس ايديا
وعينه جت في عنيا
قالي ياهنية :
اناماشي في الفجرية
علي فين يانين عيني؟
ياعمري ياكل سنيني
علي فين يادي الولد ؟
ضحكت عنيه وقال:
ياهنية مبقاش ولد
دا العود والله شد
والجدر هيتمد
والفرع صار وتد
الجيش واجبي ياامي
لازم اقوم أمد
خرس لساني واتعقد
ولا قدرت ارد
رنه في وداني غنوة
مدد مدد مدد
شدي حيلك يابلد
حضنه رمش عيني
ودعايا بقي بيرد
يحميك اللي جابك
م العين والحسد
دعايا في سماك
منين ماتروح وراك
سحابه تضلل تنسم هواك
يامصر ولدي جايلك
وصي اخواته عليه
قولي للبكري انه يشيله جوه عنيه
قوليله يعلمه من غير مايألمه
قوليله ياكبير
اوعي يجيني كسير
اوعاه يبقي ذليل
لنفوس ناقصة كتير
طول عمره رافع راسه بين اهله وناسه
أمانة عليكو يجيني بضحكته
أمانة عليكو أشوف فرحته
وقلبي يرقص يوم حنته
مش تيجيني بالدم
محنيه بدلته
نفسي يوم ماعيني تفارق دنيته
يشيل كفني بأديه
وكتفه اتزين بيه
مش انا اللي اشيله
وفي التراب اواريه
أمانة يامصر وصي اخواته عليه
#Zhret-Sbah

 بواسطة Zhret El Sbah